॥ శ్రీరామాయ నమః ॥
యుద్ధకాండం — ప్రథమ సర్గం
శ్లోకం 1
శ్రుత్వా హనుమతో వాక్యం
యథావదభిభాషితం ।
రామః ప్రీతిసమాయుక్తో
వాక్యముత్తరమబ్రవీత్ ॥ 1 ॥
శ్లోకం 2
కృతం హనుమతా కార్యం
సుమహద్భువి దుర్లభమ్ ।
మనసాపి యదన్యేన
న శక్యం ధరణీతలే ॥ 2 ॥
శ్లోకం 3
న హి తం పరిపశ్యామి
యస్తరేత మహోదధిమ్ ।
అన్యత్ర గరుడాద్వాయోః
అన్యత్ర చ హనూమతః ॥ 3 ॥
శ్లోకం 4
దేవదానవయక్షాణాం
గంధర్వోరగరక్షసామ్ ।
అప్రధృష్యాం పురీం లంకాం
రావణేన సురక్షితామ్ ॥
ప్రవిష్టః సత్త్వమాశ్రిత్య
జీవన్ కో నామ నిష్క్రమేత్ ॥ 4 ॥
శ్లోకం 5
కో విశేత్ సుదురాధర్షాం
రాక్షసైశ్చ సురక్షితామ్ ।
యో వీర్యబలసంపన్నో
న సమః స్యాద్ హనూమతః ॥ 5 ॥
శ్లోకం 6
భృత్యకార్యం హనుమతా
సుగ్రీవస్య కృతం మహత్ ।
ఏవం విధాయ స్వబలం
సదృశం విక్రమస్య చ ॥ 6 ॥
శ్లోకం 7
యో హి భృత్యో నియుక్తః సన్
భర్త్రా కర్మణి దుష్కరే ।
కుర్యాత్ తదనురాగేణ
తమాహుః పురుషోత్తమమ్ ॥ 7 ॥
శ్లోకం 8
యో నియుక్తః పరం కార్యం
న కుర్యాన్నృపతేః ప్రియమ్ ।
భృత్యో యుక్తః సమర్థశ్చ
తమాహుర్మధ్యమం నరమ్ ॥ 8 ॥
శ్లోకం 9
నియుక్తో నృపతేః కార్యం
న కుర్యాద్యః సమాహితః ।
భృత్యో యుక్తః సమర్థశ్చ
తమాహుః పురుషాధమమ్ ॥ 9 ॥
శ్లోకం 10
తన్నియోగే నియుక్తేన
కృతం హనూమతా ।
న చాత్మా లఘుతాం నీతః
సుగ్రీవశ్చాపి తోషితః ॥ 10 ॥
శ్లోకం 11
అహం చ రఘువంశశ్చ
లక్ష్మణశ్చ మహాబలః ।
వైదేహ్యా దర్శనేనాద్య
ధర్మతః పరిరక్షితాః ॥ 11 ॥
శ్లోకం 12
ఇదం తు మమ దీనస్య
మనో భూయః ప్రకర్షతి ।
యదిహాస్య ప్రియాఖ్యాతుర్
న కుర్మి సదృశం ప్రియమ్ ॥ 12 ॥
శ్లోకం 13
ఏష సర్వస్వభూతస్తు
పరిష్వంగో హనూమతః ।
మయా కాలమిమం ప్రాప్య
దత్తస్తస్య మహాత్మనః ॥ 13 ॥
శ్లోకం 14
ఇత్యుక్త్వా ప్రీతిహృష్టాంగో
రామస్తం పరిషస్వజే ।
హనూమంతం కృతాత్మానం
కృతవాక్యముపాగతమ్ ॥ 14 ॥
శ్లోకం 15
ధ్యాత్వా పునరువాచేదం
వచనం రఘుసత్తమః ।
హరీణామీశ్వరస్యాపి
సుగ్రీవస్యోపశృణ్వతః ॥ 15 ॥
శ్లోకం 16
సర్వథా సుకృతం తావత్
సీతాయాః పరిమార్గణమ్ ।
సాగరం తు సమాసాద్య
పునర్నష్టం మనో మమ ॥ 16 ॥
శ్లోకం 17
కథం నామ సముద్రస్య
దుష్పారస్య మహాంభసః ।
హరయో దక్షిణం పారం
గమిష్యంతి సమాగతాః ॥ 17 ॥
శ్లోకం 18
యద్యప్యేష తు వృత్తాంతో
వైదేహ్యా గదితో మమ ।
సముద్రపారగమనే
హరీణాం కిమిహోత్తరమ్ ॥ 18 ॥
శ్లోకం 19
ఇత్యుక్త్వా శోకసంభ్రాంతో
రామః శత్రునిబర్హణః ।
హనూమంతం మహాబాహుః
తతో ధ్యానముపాగమత్ ॥ 19 ॥
॥ ఇతి వాల్మీకి రామాయణే ఆదికావ్యే
యుద్ధకాండే ప్రథమః సర్గః ॥
॥ శ్రీ సీతారామచంద్రార్పణమస్తు ॥